Renungan Harian 14 Juli 2012

Sabtu, 14 Juli 2012.
Happy weekend all.....
Sijahaon:
Manogot  Psalm 84:8-12                                                              Bodari  Luk. 9:12-27

1. MARENDE BE No. 133:2.   “Naeng Pujionhu Ho Jahowa”
     ♫ Anggiat apiMi ma galak Marlojong tu saluhut bangso i. Jahowa sai paborhat halak Na burju mangkatahon hataMi. Sai tatap lambas ni gotilon i Ianggo naposoM otik do i.
2.  TURPUK : 2 Korint 7:5-6
     Ai nang di haroronami tu Makedonia, ndang marhasonangan dagingnami, sandok porsuk do huhilala hami: Paraloon sian duru, hatahuton sian bagasan. Alai Debata, na mangapul na toruk marroha. I ma mangapul nang hami, dibahen haroro ni si Titus.

                                                          Hatindangkon Debata
HATORANGAN:
Ben Sadok, sahalak na sai marsogo ni roha marnida halak na asing, jala na sai lomo rohana marnida hahansiton ni halak. Di na sadari, mardalandalan do ibana mamolus oasis di parhorsihan. Diida ibana ma sada tunas ni harambir  na baru mullop di tano i. Tarida do tunas i na laho parohon paruntungan. Alai tibas ni si Ben Sadok sai mangubitubit huhut mandok: “anggo ho marujung ma ngolum!” Dihindat ibana ma sada batu na bolon  jala ditipahon toho di punsu ni harambir i. “Hansit ma hilalaonmu bahenon ni batu on”, ninna ibana mangarehei. Diuji harambir na baru tubu i do mangarunta alai ndang tarbahensa pahusor batu i. Holan sada nama dalan na boi dipatupa ima marhite na pabagas uratna tu toru asa margogo manahan boban na songon i boratna. Asa gabe manginsir ma angka uratna tu humaliang na adong aek. Marhite i gabe hatop ma ibana martumbur jala magodang jala mansai ramos parbuena. Alai dung manang piga taon ro ma muse si Ben Sadok tu inganan i. Sai dilului ibana ma harambir na nidondonan ni batu i. Ai di rohana ndang tubu be harambir i. Dungi dipatunduk harambir i ma punsuna laho patuduhon tu si Ben Sadok batu na sai solot di punsuna  huhut ma didok: “hudok ma mauliate tu ho Ben Sadok alani batumi. Ai boban on ma mambahen ahu tumimbo sian sandok harambir na adong dison. Keluarga na hinaholongan ni Tuhanta, gabe tiruan do ngolu ni harambir on tu hita. Jotjot do tajalo pambahenan na roa sian halak, sipata sorat tahilala, sipata mabiar jala tahutan hita marnida angka pambahenan hajahaton i, alai ndang tuk i laho mangago hita, alai bahkan boi doi gabe mambahen hita tamba maju, jala lam semangat marjuang di ngolu on.
Hamu angka dongan, dang diloas Debata ngolu ni angka na girgir mangoloi jala unduk tu panjouon dohot parsuruon ni Debata gabe mago jala mandele. Dang diloas Debata talu ngolu, semangat dohot usaha ni angka na mangoloi Ibana. Alai sai ditogutogu, diiringiring, diparmahani, diapuli jala dipasabam Debata do roha, pingkiran nang panghilalaan nasida marhite ragam ni angka na tau palas roha ni na unduk tu Debata. Dang pangambati angka ragam ni na masa di portibi on laho mangotapi sangkap ni Debata marhite angka na porsea i. Ai ndada saguru di jolma manang di portibion ngolunta, alai saguru di lomo ni Jahowa do. Amen!.
3. TANGIANG PANGONDIANON. 
4. MARENDE BE No.  293:2.     “Ndang Jumpang Hian”
    ♫ Saleleng dison Dokdok do roham, Hansit pamatangmu Marilu matam. Sai bereng tu ginjang Ai Jesus naeng ro Sai taon ma satongkin Mangolu ma ho.
   
5.   TANGIANG ALE AMANAMI.